განათლების უფლება საქართველოს ყველა მოქალაქისათვის კონსტიტუციით არის გარანტირებული. მაგრამ ქვეყნის მთელ ტერიტორიაზე განათლების თანაბარი ხარისხი და ხელმისაწვდომობა რეალურად უზრუნველყოფილი ვერ არის. ჩვენს მიერ შემოთავაზებული ანგარიში განიხილავს ხარისხიანი განათლების ხელმისაწვდომობას ქვეყნის ერთ–ერთი ყველაზე მოწყვლადი ჯგუფისათვის. ეს არის ოკუპირებულ აფხაზეთთან და სამხრეთ ოსეთთან/ცხინვალის რეგიონთან გამყოფი ხაზის გასწვრივ და თავად ოკუპირებულ ტერიტორიებზე მცხოვრები ქართველი მოსახლეობა. ამ ჯგუფის შიგნით მნიშვნელოვან წილს, შესაბამისი კონფლიქტების შედეგად, ყველაზე მეტად დაზარალებული მოსახლეობა – დევნილები შეადგენენ. ანგარიში დიდწილად – მასწავლებლების, მშობლების და უფროსკლასელი მოსწავლეების ფოკუსური ჯგუფების ანალიზს ეყრდნობა. ამას გარდა, გაანალიზებულია არსებული ანგარიშები, კანონმდებლობა და სტატისტიკა. 

ეს ანგარიში ჯერ მოკლედ განიხილავს კვლევის მიზნებს, მეთოდოლოგიას, აღწერს და აჯამებს ოკუპირებულ და მიმდებარე ტერიტორიაზე მცხოვრები საქართველოს მოქალაქეების მიმართ საქართველოს სახელმწიფო პოლიტიკას განათლების მიმართულებით, აანალიზებს აფხაზეთისა და ცხინვალის რეგიონის გამყოფი ხაზის გასწვრივ მცხოვრები მოსახლეობის დისკუსიის შედეგებს და აქედან გამომდინარე, გვთავაზობს რეკომენდაციებს.